Australia Day ond anderi Täg

Als erschts mol s' Thema anderi Täg, ich denk mol es esch interessanter mol vo mim erschte Schueltag z verzelle!

Met ere brand neue Uniform ond gnueg nervosität ben ich denn mol ed Schuel gfahre worde.(ich han mich natürli gwehrt mich en e 10 min (z fuess) entfernti Schuel fahre z lah, aber mini Gaschteltere send mendeschtens genauso ufgregt gsi mich ed Schuel z brenge, also hani ja fasch mösse ja sege ;D).

E die Schuel gönd 1800 Schüeler, das heisst sie esch zemli gross, ond uf jedefall bis jetzt han ich no öberhaupt kein plan, wo ich amig hi lauf. Zom Glöck gets so liebi Schüeler wo eim d' Schuel zeiged (: Also han ich schomol die erschte mega liebe Lüt kenne glernt, ond han denn au chönne met ehne z'Mettag esse. Derzwösche hett mer 2 Stond schuel am morge ond 2 Stond schuel am nomittag. S' schade esch, das mer kei „feschti Klass“ hett sondern, e neui Klass för jedes Fach. Alli send sehr fründlich ond helfsbereit gsi aber bis jetzt eschs recht schwer Lüt wörkli guet kennezlerne, well mer nor emmer 1 Stond zeme Schuel het, es werd aber met jedem Tag gaz aber besser :).

Mis lieblings Fach esch (natürliiiii ;D) arts, alli wo e dem Fach send, send mega begeisteret ond interessiert a Konscht. Die andere Fächer send au chli andersch als eusi Fächer e de Schwiiz, en PE was be eus öppe Sport esch, hett mer d helfti vo de Ziit Theorie ond luegt zom Bischpel d Theorie vonere Bewegig a. Ich han Marine Studies als Fach was es (leider) e de Schwiz ned get. Sowit ich verstande han, gömmer bald mol go schnorchle! Mer wörded au no en Boot Lizenz mache, leider ben ich denn nömme do:(

De anderi Tag wo euch vellecht interessiert esch de Australia Day, mer chan de öppe met em 1.Auguscht vergliche, nor esch es en Australie de 26.Januar. Nor send en Australie leider Fürwerk verbote. D' Lüt send sogar no chli Patriotischer als mer Schwitzer, es esch zemli normal das fascht alli Ozzies met Australie T-shirts omelaufted ond mer gseht mendischtens 3 mol so vell Flagge als e de Schwiz.

E eusere Familie send grad mol 2 Barbeque agseit gsi (: Am Mettag send mer zo de Tante vom Luke ond hend dete sini ganz Familie troffe. Am Obig send mer denn au no zo de Eltere vo de Jess ond hend grad nomol e gschezti tonne Fleisch gesse :)  

Zerscht mol es liebs Grüessli a alli die wo de Samstig erscht so omdi 10 oder spöter ufgstande send, ich beniede euch! Aber well do scho am 5i d Sonne ufgaht ond du spötischtens am 8i grillt wersch, han ich mim Morgemoffel dasein leider mösse tschau sege, ond stan jetzt schön brav am halbi 7i am Morge uf. Das schint aber zemmli normal z si, z.B esch es ganz öblich das mer no vor de Schuel (am 9i) no schnell Sport gaht go mache. Das heisst för mich neus Schwömmtraining 30!

Ond jetzt no chli öber wechtigs oder eher onwechtigs Zeugs vo Australie:

Es exischtiert wol de, wie söll ich das beschribe, „interessantischt“ Brotufstrech vo de Welt, das Etwas heisst Vegimine, ond wie mer en Frau em Supermarkt netterwis metteilt het, nennt mer das au no Chenndsmesshandlig. Naja aber natürli ben ich als ned-Australier de zue brocht worde s' z probiere, ond ich chan nor sege die Frau hett recht gha(:

S Wätter esch die erschte Täg zemmli rägnerisch gsi, alli hend sich ombedengt be mer welle entscholdige ond hend mer versecheret eigentli segs ned emmer so. Trotzdemm hets glanged mini Scholtere em ne schöne Rotstech z färbe...woher söll ich denn bitte wösse, das mer au chan Sonnebrand becho wenns Bewölkt esch dosse?! Geschtert esch denn aber au no die lang ersehnti Sonne före cho, ond ich han min erschte, wonderschöni Sonneontergang gseh.

Es esch en Hervey Bay öblich, das Schelder met Achtong Kangaroo oder Achtong Koala droffe omestönd (öppe so wie die met de Reh droffe be eus) , komischer wiis existiered au Schelder met Kamel droffe, was eher ontypisch esch för Australie. Das Scheld en Hervey Bay existiert well ergend so en spennende Australier d Idee gha hett, es wär doch cool, wenn mer chönnti am ne Australische Strand Kamel rite...passt ergendwie ned zöme (: Ich ben aber belehrt worde, das es wörklich freilebendi Kamel en Australie get, eifach zemli ergendwo em nergendwo!

Mis Zemmer (:

Das esch em ne 200 Jahr alte Theater
en Maryborough, e Nachbarstadt vo Hervey Bay

Bildunterschrift hinzufügen

Oh, kangaroo!

Hoi zäme, naja ich han zwar versproche de Blog uf englisch z schribe, ich denk aber das werd denn spöter mal omgsetzt. En Australie esch es jetzt halbi 7i ond ich ben hellwach.(Nachdem ich schön brav am achti am Obig es Bett gange benn). Schlossendli hoffi mis Jetlag esch dermet verbi.

So, denn mössti mol afo verzelle hm? Also was mer vom Flug so z'brechte hett esch:

1. Dubai esch zemmli öberföllt

2. S' ässe esch „interessant“

3. In Sydney hetts en 2te Flughafe, 7 Minute entfernt (wie söll mer denn das bitte wösse??)

4. Australischi Stewardess send vell fröndlicher als anderi

5. Mer gaz guet (:

Nachdem ich acho ben, händ mich d Jessica ond de Luke (mini Gaschteltere) ond mini Betreuerin d Rhonda abgholt uf eme munzipunzi Flughafe (met Stäge vom Flugi abe, wer kännt den das no?:)

Uf em wäg zom poschte han ich au grad no d Schwöschter vo de Jessica kenne glernt, sie heisst Melissa ond esch glich alt wien ich (: Ond jetzt no e chlini erklärig warom mini Gaschtmueter so ne jongi Schwöschter hett, mini Gaschteltere send zemli jung , sie send....23!!! Ond natürli mega lieb:) Zom z'mettag send mer zom Subway well mer so honger gha hend, was mer met anderne Gaschteltere ned so oft macht ;)

Uf de heifahrt esch denn au no was sehr wechtigs passiert. Ich han mis erschte Australische Kangoroo gseh! Ond ned ergend eis Kangoroo sondern es meega cools, de Luke bremst plötzlich ond meint: Oh, kangoroo! Ich lueg natürli grad uf nd gseh es Kangoroo gmüetlich vor em Auto dore hopse. De Luke hett mer nacher erklärt, dass Kangaroos so öppis wie vortrett hend, da sie zemlich schade am Auto chönd mache, falls es es „kangaroo vs. Auto“ wörd geh.

Jetzt no was zom allgemein gliebte Dialäkt vo de Aussies. Ich ben emmerno e de „wie bitte?“ Phase, es esch vorallem aber e gwönigs Sach. Mer send am Obig be de Eltere vom Luke gsi, ond dete han ich glernt, das de Dialekt vo mine Gaschteltere nüt esch zom Dialekt vom Vater vom Luke. Er hend mer denn erklährt, dass er vom „enneland“ en Australie chonnt, ond d Regle esch sowit ichs verstande han, dass je witer ine chonnsch, desto schlächter verstosch d Lüt(: Obwohl mer sich ned so guet verstande hett, händ mich alli sehr lieb empfange ond send sehr enttüscht gsi, well ich han mösse die toll schwizer Schoggi am Australische Zoll abgeh.

So, das wär min erschte Blog gsi ond ich meld mich bald weder emol!

Greetings from Down Under!!